Reer Miyi
Waan ku
Faanayaa inaan Miyi ku dhashay, halkan na ay tahay halkii Tagtadii ka imid (
Proud to be from Nomadic Life)
Sawirkan waxa
aan galay sannadkii bishii Ogosto, sannadkii 2016kii. Goobtu waxa weeyi Miyigii
aan ku dhashay ee MADARKA AMA OOGADA gaar ahaana meesha la yidhaahdo QORIJABKA.
Halka aan sawirka ku galay waa qaybta kore ee beertayada. Waa waqtigii duruufta
iyo silicu jiray, dadka iyo xooluhuna liiteen. Adhiga yari waa laxo yaryar oo
duruufuhu keeneen. Mar waxa aan la yaabbanahay diifta indhahayga, muuqaalkayga,
iyo guud ahaan qaabkayga ka muuqata; marna waxa aan ka dhiillaysanahay
deegaanka aan joogo iyo diifta ka muuqata waqtigaas. Sawirkani xasuusahayga
ayuu iigu jira, waa kuwa aan ku indhakuusho ee dhiirrigelinta I geliya. Waa
halkii aan ka imid waqti ka mid ah noloshayda, halka aan ka imid waan garan
karaa. Waa marxalad nololeed oo aan soo maray, aad baanan ugu hanwaynahay inaan
nolol sidaa u adag oo qallafsan soo maray, se waxa aan ku faraxsanahay inaan
weli ka sii gudbayo, meel fiican na wax wado.
Waayihii aan
yaraa waxa aan aad u eegi jirey xoolaha, oo waxaa la igu illaaway daajinta
duunyada haddii ay tahay xannaaneyntooda iyo daryeeliddooda. Kaliya waxaanan
qaban jirin waxyaabaha awooddayda dhaafsan sida xergeynta xoolaha, kasoo
waraabinta Barkadaha-gaar ahaan kuwa waliba ‘dawliiska’ la darayo ee ceelka
inta la dul joogsado Caagga lagu sii daynayo, Carrasiinta, Xamaku uusoo
diyaarinta, rista usoo foqida jiilaalka, IWM.
Intaa oo awoodeyda ka baxsaneyd marka laga yimaado, waxalla wixii kale
anigaa gacanta ku hayn jirey.
Xoolaha waan
foofin jirey, oo weliba meelo fogfog ayaan gayn jiray jiilaalkii. Mararka qaar
waxa aan geyn jirey meel aad u dheer, taasi oo sababi jirtay marar qaar in
shaaha duhurkii la iigu keeni kari waayo meelahaas dheer aawadeed. Oon,
harraad, iyo cuntala’aan ayaan mararka qaar ahaan jiray. Nolol adag oo qofka
xammila ee u adkaystaa uu yahay qof xaaladaha kale ee adage e nololeedna ka
gudbi kara ayuu ahaa.
Waan ku
faraxsanahay inaan Miyi ka imid. Dadka qaar ayaa cay iyo calaacal u arka qofku
haddii uu ka warramo halkii uu ka yimid ( ha ahaato meel FIICAN AMA MEEL
LIIDATA) ta ay doontabee. Dadkaasi habeen may jirin, waxbadan ayaana u dhiman.
Waxa aan qabaa in qofku waayahiisa sheego isaga oo dhiirrigelin iyo xasuus u
qaadanaya, se aan u soo qaadanayn liidid iyo waxkale. Xasuusuhuna waxa ay
leeyihiin kuwo macaan iyo kuwo qadhaadh, waxa aan qabaa in labadaba qofku
caddaalad ka sameeyo oo wada sheego. Ciddii la yaabtaana iyadaa waalan.
Waan ku
faraxsanahay inaan Miyi ka imid, oo dhal Miyi ahay. Waan ku faraxsanahay inaan
khibradahaa nololeed ee adag soo arkay soona maray. Waxa aanan intaaba kaga sii
niyadsamahay inay xaaladahaas adag iyo xusuusuhuba ii yihiin shidaan aan ku
dhaqaaqo oo dhinaca horumarka iyo ilbaxnimada ugu socdo.
Cabdirasaaq Sandheere
Maarij, 2020.
Boorama, Awdal.
Maasha'allaah👍
ReplyDelete