Qisada Asma Bintu Abiibakar: Asxaabiyada Cajiiba

 

Asma oo markan ahayd duq gabawday oo xataa indhaha aan waxbadan ka arkin, hooyadii ayuu Cabdillaahi ku yidhi: “ Salaamu Calaykum Waraxmatullaahi Wabaraaku.” Hooyadii ayaa ugu jawaabtay “ Wa Calaykuma Salaam Cabdillaahiyoow. Saacaddan maxaa ku keenay ee ku wada, waayo hubkii iyo rasaastii uu Xajaaj soo tuurayay ee ciidankaaga ku tuurayay aya gilgilaysa guryaha Maka? Cabdillaahi baa hooyadii ku yidhi: “ Waxa aan kuugu imid si aan kuula tashado.” Markaasay tidhi: “ Maad ila tashanaysaa.. Oo maxaad igala tashan?’ Markaas ayuu yidhi: “ Dadku way I hoojiyeen, waxayna igu beereen cabsi aan ka cabsanayo Xajaaj. Xataa carruurtaydii iyo ehelkaygii way iga eryeen. Kaliyaatana waxa ay ii reebeen koox yar oo raggaygii ka mid ah; si kasta oo ay dulqaad badanyihiin una adkaystaan ma samri karaan wax ka badan saacad ama laba saacadood. Raggii reer Banii Umayana waxa ay igula gorgortamayaan inaan hubka dhigo oo taageero Cabdilmalik Ibnu Marwaan, iyaguna ay iigu baddelaan oo siiyaan hanti in alla intii aan doono, sideed adigu u aragtaa?

Hooyo Asma ayaa codkeedii kor u qaadday, waxayna tidhi: “ Arrintu sida aad adigu rabtid ayay noqonaysaa Cabdillaahiyoow, adiga ayaa naftaada iga yaqaanna… Haddii aad rumaysantahay in aad adigu xaq ku taagantahay,  dadkana xaq ugu yeedhaysid Samir oo u adkayso sidii ay u adkaysteen asxaabtadii calankan aad hadda hoosjoogtid lagu hoos dilay. Haddii aad adduunyo doonaysid na addoon xun baad noqonaysaa, oo naftaadii waad halaagtay, raggii kula socdayna waad halaagtay.” Cabdillaahi baa yidhi: “ Balse, maanta shaki la’aan waa la I dilayaa.” Hooyadii ayaa ku tidhi: “ Tan ayaa kuu wanaagsan halkii aad isku dhiibi lahayd ee naftaada hoos gayn lahayd Xajaaj, ee madaxaaga ay ku ciyaari lahaayeen carruur reer Banii Umaya ahi.” Cabdillaahi baa yidhi: “ Anigu dil kama cabsanayo, waxa aan ka cabsanayaa in ay I googooyaan.” Hooyo Asma ayaa tidhi: “ Dhimashada ka dib qofku wax kuu ka baqaa ma jiro, Laxda marka la gawraco in haragga laga saaraa ma dhibo.”  Cabdillaahi wuu farxay, oo laalaabyada wejigiisa ayaa farxad darted isku furfuray, wuxuuna yidhi: “ Hooyo barakoow, anigu saacaddaas kaliya waxa aan kuugu imid in aan kaa maqlo waxaas aan kaa maqlay, Alle wuu ogyahay in aanan quwad jebin oo aanan daciifin… Anigu wixii aad jeclayd ayaan ku dhaqaaqayaa oo samaynayaa, haddii la I dilo ha ii murugoon, arrintaadana Alle u dhiibo.” Hooyadii ayaa ku tidhi: “ Waan kuu murugoon haddii xaqdarro lagugu dilo.” Cabdillaahi ba yidhi: “ Kalsooni ku qab in aan inankaagu weligii xumaan u qasdiyin oo si kas ah ula iman, iyo in aanu weligii faaxisho samayn, xukunka Allana kuma xadgudbin, ballana kama bixin oo ma burin, weligiina kas uma dulmin qof Muslina ama mid ballani ka dhexaysay, mana jiro wax agtiisa kaga wayn raalli ahaanshaha Alle. Waxaas oo dhan kuuguma sheegayo in aad naftayda beri yeeshid, taas Alle uun baa og, balse waxyaabahaas oo dhan waxa aan kuugu sheegayaa si aan kuu samirsiiyo, oo qalbigaaga adkaysi geliyo.

Waxa aan ka soo xigtay turjumaadda Kitaabka ' Milicsiga Sooyaalka Asxaabta.'