Asxaabigii jacaylka u qaaday Nebi Muxammad SCW

-

 


Anas, isaga oo yar ayay Hooyadii Shahaadataynka (Laa Ilaaha Illalaah, Muxammadu Rasuululaah) u laqintay. Mararka qaar dhegtu wax ay maqashay ayay caashaqdaa, oo aragtidaba way ka horraysaa. Anas, isaga oo aan arag ayuu Nebi Muxammed (NNKH) Jaceyl u qaaday. Anas, Madiina ayuu ku noolaa waqtigaa, Nabi Muxammad na (NNKH) magaalada Maka ayuu ku noolaa.
Hijradii Nebi Muxammed ayaa dhacday, oo Nabigu Madiina ayuu u soo hijrooday. Waa hoygii Anas. Anas, jaceyl ayuu sii dareemay markuu maqlay in Nabi Muxammed Madiina imanayo. Carruur iyo cirroolaba waa la soo dhaweeyay Nabi Muxammed. Asxaabtii soo dhawaysay kuwii soo hijrooday waa tii magaca ‘ Ansaar’ loo bixiyay. Anas walow uu yaraa haddana wuu soo dhaweeyay.
Markii uu Madiina waxyar joogay Nabi Muxammed (NNKH), ayay Anas Hooyadii Qumaysaa u timid Nabiga iyada oo inankeedii Anas la socdo. Waxa ay ku tidhi: “ Rag iyo dumar laguuma kala hadhin, anigu Inankaygan Anas ayaan kuu wadaa. Kaxayso ha kuu shaqeeyo, oo waxa aad doonto ha kuu qabto.” Nabigu, wuu farxay, Anas ayuu madaxa ugu salaaxay gacantiisii sharafta lahayd.
Anas, waqtigaa uu Nabi Muxammed raacay wuxuu ahaa toban sano jir. Halkaas ayuu madarasaddii Rasuulka (NNKH) kaga biiray. Muddo badan ayuu Diinta ka baranayay, Axaadiisatana ka warinayay. Nabiga illaa intii uu dhimanayay wuu la noolaa. 10 sano markii uu la joogay ayuu Nabigu dhintay (NNKH). Intii uu la noolaa dhaqan wanaagsan ayuu kala kulmay.

Anas, wuxuu ka sheekeeyay qiso isaga iyo Nabi Muxammed (NNKH) dhexmartay. Wuxuu sheegay in maalin Nabigu meel u diray. Dabadeedna, uu arkay carruur ciyaaraysa. Wuu yaraa, oo waqtiga ay carruurtu yaryihiin ciyaarta ayay jecelyihiine Anas carruutii ayuu ku leexday oo ciyaartii ayuu la bilaabay. Markii ciyaartu dhammaatay, ayuu arkay nin dabataagan. Wuu eegay, waaba Rasuulkii (NNKH) oo dhoollacaddaynaya. Nabiga ayaa ku yidhi: “Anasyaroow, ma tagtay meeshaan kuu diray?” Markaasuu Anas yidhi: ‘ Haa. Hadda ayaan tegayaa.”
Anas, wuxuu yidhi: “Wallaahi baan ku dhaartee, 10 sano ayaan Nabi Muxammed (NNKH) u shaqaynayay. Wax aan sameeyay ima odhan maxaad u samaysay. Waxa aan samayn waayayna ima odhan maxaad u samayn wayday.” Dhaqan wanaagsan, oo ixtiraam, iyo jaceyl ku dheehanyahay ayuu Nabigu (NNKH) lahaa.
Wuxuu ku dadaali jiray inuu Nabiga ka qaato wixii uu amray, wixii uu ka reebayna inuu ka tago. Wuxuu Anas, yidhi: “ Laba maalmood ayaan aad u xasuustaa Nabiga. Waa: maalintii aan la kulmay iyo maalintii uu geeriyooday.” Maalinta uu la kulmay markuu xasuusto wuu farxijiray, oo waa maalintii ugu horraysay ee uu arko qofkii uu jeclaa. Halka maalinta uu dhintay Nabi Muxammed marka uu Anas xasuusto uu murugoonjiray oo ooyi jiray.
Nabigu (NNKH) wuu u duceeyay Anas, oo wuxuu yidhi: “ Allow, ku arsaaq xoolo iyo carruur, una barakee.” Alle, wuu u aqbalay ducaadaa, oo Anas wuxuu ka mid noqday Ansaartii kuwii ugu hantida badnaa. Carruur badanna wuu dhalay, oo waxaa la sheegaa in carruurtii uu dhalay, kuway sii dhaleen ay illaa 100 gaadheen. Da’dana Alle wuu u barakeeyay, oo wuxuu gaadhay 100 sano jir.
Markii uu dhimanayay, wuxuu dardaarmay in Shahaadada loo laqimo, Nabiga agtiisana lagu aaso. Ballantii waa loo fuliyay. Sidaas ayuu ku geeriyooday Asxaabigii qaaliga ahaa ee aqalka Rasuulka ku soo barbaaray. Anas, Alle haka raalli noqdo.

Xigasho buuga Milicsiga Sooyaalka Asxaabta

Comments

Post a Comment

Popular posts from this blog

Gorfeynta Buugga “ A Woman of Firsts ~ Marwadii koowaad” oo Dr Edna Aadan qortay

-
Image
Hordhac Buuggan waxa lagu magacaabaa “ A woman of Firsts ~ Gabadhii ugu horreysay.” Cinwaanhoosaadkiisu waa ‘ The Midwife who built A hospital and changed the world ~ Ummulisadii Cusbitaalka dhistay ee adduunyada baddeshay!” Waxa qortay Adna Aadan Ismaaciil. Adna, waa aasaasaha Dhaktarta Adan Aadan, iyo Jaamacadda Adna Aadan. Waxa ay soo noqotay Wasiirkii Arrimadaha debadda, iyo sidoo kale wasiirkii Arrimaha bulshada Soomaalilaan. Haddana waaa xubin ka mid an wadahadallada Soomaalilaan iyo Soomaaliya. Waxa ay isguursadeen, oo ay xaas u ahayd Madaxweynihii hore ee Soomaalilaan Maxammed Xaaji Ibraahin AHUN, sidoo kale Raysalwasaare ka noqday Soomaaliya waqtigii midawga. Waxa uu ka koobanyahay   257 bog. Waanna 17 Cutub oo xidhiidh ah. Waxa uu ka warramayaa taariikhnololeedka Adna Aadan.   Waxa aan isku dayayaa in aan gorfeeyo, oo meelaha qaar naqdiyo. Sidoo kale, nuxurka guud soo koobo. Nuxurka buugga Buugga intaanad gelin dhinaca hore ee XUQUUQDA buugga lagu qoro, w...
Read more

Faallada buuga " Dariiqa Habdhaqanka~The Road to Character"

-
Image
  Hordhac Buuggan la yidhaahdo waxa qoray qoraa   David Brooks . Waa buugii 4aad ee uu qoray qoraagu. Mawduuca uu buugani ka warramayo qoraagu muddo badan ayuu dhigan jiray oo Jaamacadda YALE ka diyaariyay. Buugga waxa la daabacay sannadkii 2015kii, waqtigaas uu daabacay qoraagu wuxuu yidhi: “ Buuga waxa aan u qoray si aan u noqdo daacad, iyo si aan u badbaadiyo ruuxdayda. Qoraagu wuxuu buuga kaga warramayaa labada shay ee dabeecad ahaan qofka gudihiisa iyo debaddiisa ku hirdamaya. Nuxurka Buuga Waxa aynu kaga warrami doonaa cashirro ka mid ah kuwa buuga laga baran karo 1-       Isdhuldhigu waa awood: Awoodda dhabta ahi maaha kibirka, balse waa in qofku aqoonsado oo garto xuduudaha uu leeyahay, iyo inuu hore u socday. Isdhuldhigu waa seeska habdhaqanka. 2-     Muhiimadda deegaanka wanaagsan: Deegaanka wanaagsan ee qofka niyad ahaan taageerayaa wuxuu qaabeeyaa habdhaqanka. In aan nafaheenna ku hareerayno dadka wanaags...
Read more

Faallada buuga “ UNDERSTANDING YOUR POTENTIAL~ Garo karaankaaga”

-
Image
  Hordhaca Buugan la yidhaahdo ‘ Garo A karaankaaga’ waxa qoray qoraa   MYLES MUNROE. Qoraagu mawduucyada la xidhiidha arrimahan karaanka ayuu aad wax uga qoraa. Qoraagu wuxuu ahaa siyaasi xilal kala duwan oo wasiirnimo soo qabtay, sidoo kale waa dhirrigeliye, macallin jaamacadeed iyo qoraa. Buug kala duwan buu qoray, buugta uu qoray waxa aan ka xusi karaa   buuga la yidhaahdo “ The Principle and Power of Kingdom Citizenship: Keys to Experiencing Heaven on Earth" oo uu qoray sannadkii 1992kii. Qoraagu wuxuu dhintay sannadkii 2014kii. Isaga iyo xaaskiisa ayaa ku geeriyooday shil diyaaradeed. Shilku wuxuu ka dhacay Grand Bahama International Airport. Nuxurka Buuga Buugan qoraagu wuxuu soo saaray sannadkii 1992kii. Halkan waxa aan ku soo koobaynaa 10 cashir oo laga baran karo buuga: 1-       Garo ujeeddada kuu gaarka ah: Buugan ‘ Garo Karaankaagu’ wuxuu inna barayaa muhiimadda ay leedahay in aan yeelanno oo xoojinno ujeeddooyinkeenna. Mar...
Read more