Sookoobidda buugga “ Ku Raaxayso Noloshaada~ استمتع بحياتك”
Hordhac
Buuggan ladhkiisa la yidhaahdo “Ku Raaxayso Noloshaada ~ استمتع بحياتك” Waxa qoray Dr Maxammed Ben Cabdiraxmaan Al Cariifi. Luuqadda
carabiga ayuu sheekhu ku qoray oo u doortay asal ahaan. Dr Cariifi, waa daaci
islaam ah oo Sucuudiga u dhashay. Waxa uu wax ka dhigaa jaamacadda Boqor
Mascuud ee Dalka Sucuudiga. Shahaadada sare ee Ph.D ayuu diyaariyay, wuxuunna
ku qaatay Usuulu Diin, Caqiidada. Culimada uu wax ka bartay waxa ka mid ahaa
Sh. Cabdicasiis Ibn Baas. Kutub badan oo kale ayuu qoray, waxa ka mid ah “نهاية العالم (في أشراط الساعة)..” iyo
“تجربتي في ربع قرن (نصائح للداعية المبندئ).”
Buuggu wuxuu ka koobanyahay 290 bog. Qaybo badan ayuu iskugu
jiraa. Habdhaqanka, iyo hababka dadka lagula dhaqmo ayuu ka warramayaa.
Diktoorku muddo 20 sano ah inuu wado baadhidda iyo qoraalka buugga ayuu
xusayaa.
Qoridda buugga waxa ku dhalisay sida uu xusay, waxa uu
sheegay in markii uu jiray da’da 26 sano jir uu buugga la yidhaa “ Fanka
dadladhaqanka ” oo uu qoray Dale Carenegie, uu akhriyay. Buug cajiib ah oo aan
muddo badan ku celcelinayay ayuu ahaa ayuu yidhi. Qoraaga buugga Dale Carenegie
ayaa sheegay in qofku bishiiba akhriyo oo ka caado dhigto sidii baan sameeyay
ayuu Dr. Cariifi yidhi. Xeerarkii uu sheegayay ee dadladhaqanka ayaan dabaqay
oo noloshayda ku saleeyay dadkana kula dhaqmay ayuu Cariifi ku sii daray. Natiijo
wanaagsan ayaa iiga soo baxday ayuu yidhi. Dabadeedna, Siiradii iyo Sooyaalkii
Nebi Muxammed ayaan baadhay, waxaanan goostay inaan buuggan qoro, ayuu ku sii
daray Dr. Cariifi.
Buuggani hadda aynnu wadnaa inuuna bilo ama sannad ku qorin
oo ku soo bixine uu muddo ka badan 20 sano waday ayuu Dr. Cariifi xusayaa. Waanna erayo qalbi ka yimid, oo midkale inay
si ka qalbi ah ugu duxaan uu rabo. Raaxada uu Cinwaanka buugga ku xusayaa waxa
ay tahay QOFKU markuu DABAQO ee ku DHAQMO dhaqannadan ayuu raaxo dareemayaa,
noloshana ku raaxaysanayaa.
Nuxurka
Buugga
Buuggu waa buug ballaadhan. Xeerar iyo qodobbo ayuu u
badanyahay. Waxa aynnu isku dayi inaynnu kuwa ugu muhiimsan ee lafdhabarta u ah
buugga qaar ka mid ah si guud u tilmaanno.
Qiso isaga iyo wiil dhexmartay ayuu Wadaadku xusayaa. Waxa
uu yidhi “ Farriin baa Moobilka iigu soo dhacday. Farriintu waxa ay ahayd ‘
Sheekhoow, waa maxay Xukunta isqudhgoyntu?’ Ma fahmin. Barbaarkii waan la
xidhiidhay waxaanan ku idhi ‘ Cafwan, ma fahmin wayddiintaadii, iigu celi?’
Wuxuu yidhi wayddiintu way caddahay ‘ Waa maxay xukunka isqudhgoyntu?’ Waxa aan
doonay inaan kedis kaga dhigo jawaab aan ku soo dhacayn. Intaan qoslay ayaan
idhi ‘ Xukunkeedu waa Mustaxab.’ Wuu qaylyay, wuxuunna yidhi ‘ Maxay?’ Waxa aan
ku idhi ‘ Xukunka Isqudhgoyntu waa Mustaxab. Balse maxaad ka qabtaa haddii
aannu kaa caawinno habkii aad u samayn lahayd?’ Wuu aamusay. Waxa aan ku idhi ‘
Si fiican. Maxa aad u doonaysaa in aad isdishid?’ Wuxuu yidhi: ‘ Wax shaqo ah ma helin… Dadkuna
ima jecla… Asal ahaanna waxa aan ahay qof guuldarraystay.’ Wuu iga tagay isaga oo ii warinaya sheeko
dheer oo la xidhiidha guuldarradiisa, iyo sida uuna ugu diyaargaroobin inuu ka
faa’ideysto waxa uu haysto ee awoodo ah.’ Waa masiibo wayn oo dad badan haysata.”
Sheekadaa ka gadaal baadhisaha uu sameeyay oo uu wayddiin
ugu bilaabayo ladhadhkooga ayuu gudagalayaa. Adduunyada waa ka macruufa werwerka, xanuunka,
faqiirnimada, lacagta, qaninnimada, farxadda, IWM. Dad ka dhan way haystaane ku raaxayso noloshadaa ayuu leeyahay. Mawduucyada
uu qaadaadhigayo ee ka warramayo waxa ka mid ah:
1-
Raalli ku noqo waxa Alle
qaybiyay, oo nolosha ku raaxayso.
2-
Cibaadada Alle ku dadaal,
hoosna u dhig.
3-
Naftaada werwer ha ku
dilin, iska yaree wixii buuq kugu furaya, oo nolosha ku raaxayso.
4-
Muranka badan iska
ilaali, oo nolosha ku raaxayso.
5-
Carrabkaa ilaali oo
hadalka wanaagsan uun ku hadal.
6-
Dhoollacaddee.
7-
Ha isku kellifin
waxaanad karayn.
8-
Waxa kuu muuqda
xooggasaar, oo waxyaabaha kaa qarsoon ha baadhbaadhin.
Dadkalaqanka iyo sida wanaagsan ee dadka loola dhaqmo ayuu
buugga aad ugu falanqaynayaa. Waxyaabaha uu xusayo waxa ugu muhiimsan:
1-
Si
wanaagsan u dhaqan: Qoraagu waxa uu xusayaa inuu qofku
Masaakiinta, dumarka, carruurta, xawayaanka IWM ah ba si wanaagsan uladhaqmo.
2-
Niyada
dar Alle u wanaaji.
3-
Hadalka
ka waangsan dooro oo ku hadal: Waxa uu xusayaa inay dadku waxa
ay jecelyihiin dhagaysigiisa looga sheekeeyo, halkii looga sheekayn lahaa waxa
uu qofka sheekaynayaa jecelyahay. Wuxuunna leeyahay ‘ Dadku waxa ay
dhagaysigooda ha helaan uga sheekee, se ha uga sheekayn waxa aad adigu ka
heshid ka warramiddooda.”
4-
Dadka
kale ihtimaam sii: Qoraagu waxa uu leeyahay qalbiyada ayaan la
tacaamulnaaye jidhka lama tacaamulno, markaa dadka qalbiyadooda tixgelin gaara
sii. Dadku markasta oo aad
tixgelisid, aad bay kuu jeclaani.
5-
Qofka
magaciisa xifdi: haddii aad is aragtaan qofka, ama aad isbarataan
magaciisa xifdi oo xasuusnow,si haddii aad mardanbe u baahatid, ama aad la
kulantidba magaca ugu yeedhid.
6-
Wax
maalaaycni ah ha galin: Macne ahaan wax aynna waxba kaa galin ha
doonan. Nebigu SCW waxa uu yidhi “ Qofka Islaamka ah wanaagiisu waxa uu ku
jiraa inuu ka tago waxa aynna waxba ka galin.”
7-
Xumaanta
lagugu sameeyo wanaag ku gud.
8-
Qofka
qalad gala u nasteexee: Sheekhu waxa uu weliba ku
darayaa marka aad qofka u nasteexaynaysid, qaladkiisa ku qanci suu u qaato
nasteexada, oo qaladka uu galay si
wanaagsan ugu sheeg.
9-
Qofka
gaar wax ugu sheeg, dad dhexdii waxba ha ugu sheegin: Haddii
aad qofka dad dhexdii ugu sheegtid waad fadeexadaysay ayay ka dhigantahay. Si
gaara ugu sheeg.
10- Qaladkaaga qiro oo ha iswaynaysiin: Haddii
aad qalad samaysid waa inaad qirataa. Waayo, qofku wuu degayaa marka aad qaladkaaga
u qiratid.
11- Deeqsinnimada.
12- Dhegaysiga baro.
Gebagebo
Si guudmar ah ayaynnu buuggaa qiima leh u eeg, waa buug
ballaadhan. U dhugyeelasho badan raba. Intaas ayaan ku soo koobaynaa. Waxa kale
ee dheeraada buuggaa laga sii akhrisan.
W/Q: Cabdirasaaq Sandheere
Comments
Post a Comment