Isma Oga Agoon iyo Ninkii Aabbahood Dilay!
Waa wiil 16 jir ah, aabbihii
isaga oo yar ayuu hooyadii furey; hooyadii waxa ay ka shaqeysaa sarriimadda oo
xawaash iyo khudaarta noocyadeed kala duwan ayey ku iibisaa. Wuxuu dhigtaa dugsi
sare, aroorkasta waalla soo eryaa ama wuu habsaamaa. Mararka qaar macallimiinta
ayuu isku taagaa oo la dagaallamaa, waana la soo eryaa. Mararka qaar cashirka
ayuuna qorin, oo waalla soo eryaa. Mararka qaar sheeko iyo ciyaar ayuu Fasalka
ku bilaabaa oo looma aabbo yeelee waalla soo eryaa. Mararka qaar ardeyda ayey
islaayaan, waana la soo eryaa. Marka la soo eryo ee uu hooyadii soo kaxeeyana
waalagu hor canaantaa, hooyadiina maalinkasta waalla ciilaa oo waxa ay
macallimiinta iyo maamulku ku yidhaahdaan “Saaqidkan aad dhashey waxba ma
baranayo!”
Lacagta fiida hooyadii dirqi
ayey ku bixisaa. Intaa waxa ay isleedahay isdhib oo inankaagu wax hakuu barto,
isaga ayaa mar ku caawin doonee! Isagu waxan ba uma jeedo, ciyaar iyo
dheeldheel ayuu iskaga jiraa, mana oga, dhegna jalaq uma siiyo waxan ay
hooyadii ku hammiyeyso! Waxbarashadu daacad kama aha, kaliya wuxuu is leeyahay
hooyadaa quusi, oo in aad Dugsi dhigato ha
mooddo! Alla islaantu hammi fiicanaa, wiilkeeguna caqli xumaa! Xaaladdu
waa “ Isma oga agoon iyo ninkii aabbahood dilaye.”
Buug iyo agabkii uu wax ku
dhiganayey oo dhan ayay hooyadii u soo iibisay. Bilkastana lacag badan oo
wiilkeeda lagu ganaaxey iyo fiidii ayaa u dheer. Bil uuna wejigu ka xumaan oo
ayna macallimiinta hortagin ma jirto. Nususaacaha lacag fiican oo uu ku dhergo
ayey siisaa wiilkeeda, duhurkii markuu yimaaddana Qado fiican oo horey loo
kariyey ayaa dhakhso loogu ridaa. Hooyadu iyadu halkey aroortii fadhiisato,
cadceed dhaca ayey ka soo kacdaa, inta ay afkeeda wax saartaana way yartahay. Sida
wiilkeeda marna ma qureecato, marna nususaace ma cunto, marna qado. Halkaas
ayey cadceedda kulul iyo habaaska dhacayaan ku dilaan, oo kolba dhinac alaabta
uga daadiyaan!
Meeshaa bacadka ah ee ay
fadhido iyadu hal hammi ayey leedahay oo waa “ Haddii inankaagu wax kuu
baranayo, habaaska iyo qorraxdu waxba sheegi maayaan, waligayba waan fadhiyi”,
ayey niyada ku dhisataa. Maalinta la soo eryo ee uu wiilkeedu u yimaado niyada
ayaa ka xumaata oo maalintaa oo dhan waxyaabo badan ayey is wayddiisaa, kana
fekertaa.
Hooyadaa, mararka qaar waxaa
soo mara dhiigmarato cashuur wayddiisa oo waxaa yare e ay iibinaso ee risiqa ka
dayayso naftana ku sasabaso wax keen yidhaa, haddey diiddana ka kala daadiya oo
u hanjaba. Kolba wiilyar oo cawlan oo suuqa laga soo kexeeyay oo hooyadaa ku
cawaandadooda oo alaabta ka daadaadiya, una xoog sheegta!
Xaaladda nafeed ee dhabta ah ee
hooyadu ku sugantahay ma fahmayo wiilkeedu, oo wuxuu moodayaa wax kale.
Xaaladda nafeed ee dhabta ahna ma fahmaso hooyadu oo waxa ay moodasaa in
wiilkeedu wax u baranayo, waxna u xasilinayo. Maalinba maalinta ka danbeysana
ay usii dhawaanaso nolol fiican, maadaama inankeedii Dugsigii dhamaynayo.
Balse, ma saasaa?!
Comments
Post a Comment