Sooyaalkii Cumar Carte Qaalib ( 1930-2020)
Hordhac
Sannad buuro ah ayaa laga joogaa maalintii uu geeriyooday Alle
ha u naxariistee halgamaa Cumar Carte Qaalib ( 1930-2020). Maanta ayay ku beegantahay, hillaaddu waxa ay
ahayd 18 Noofanbar, 2020kii. Cumar, waxa uu ahaa siyaasi ruugcaddaa ah,
halgamaa muddo badan soo halgamayay, aqoonyahan aqoondhaadhi ah, iyo hoggaamiye
ruuxi ah. Cumar, wanaagkasta iyo sifo kasta oo wanaagsan oo qof lagu sheego wuu
lahaa. Waxa aynu ku qeexi karnaa; nin mabda’ lahaa, han sare lahaa, hoggaamiye
saamayn leh, halgamaa, iyo oday ummadeed.
Qoraalkan kooban waxa aan isku dayi doonaan inaan waxyar ka
taabto ama ka sheego taariikhdii facawaynayd ee halgamaa Cumar. Ma soo koobi
karo, mana dhammayn karo taariikhda iyo sooyaalka halgamaa Cumar. Balse, si
kooban oo dulmar ah ayaan isku dayayaa inaan nuxurka idina la wadaago.
Dhalashadii iyo Waxbarashadii Cumar
Cumar Carte Qaalib, waxa uu dhashay qiyaastii 1930kii. Waxa
uu ku dhashay magaalada Hargeysa. Magaalada Hargeysa ayuu wax ka bartay oo
Dugsiyada Hoose/Dhexe ka dhigtay magaalada Hargeysa. Waxa la xusaa inuu Dugsiga
Sare ka dhammeeyay dalka Yemen. Ka dibna waxa uu Cumar waxbarashada Jaamacadeed
u tagay dalka Ingiriiska.
Cumar, markii waxbarashada ka soo dhammeeyay dalka
debaddiisa waxa uu isdareensiiyay inuu bulshadii uu ka dhashay wax ku celiyo,
wuxuuna go’aansaday inuu dalka ku soo laabto oo dadkiisa iyo dalkiisa wax ku
kordhiyo. Dalka ayuu ku soo laabtay. Waqtigaas waxa lagu qiyaasaa
Kontomeeyadii. Magaalooyin badan ayuu macallin Dugsi ka noqday. Sidoo kale,
Maamule Dugsi ayuu Dugsiyo badan oo Berbera, Hargeysa iyo maagaalooyin kalaba
ku yaalla ka ahaa.
Waxa la xusaa in Cumar sannadkii 1956kii uu ku laabtay dalka
Ingiriiska, halkaasi oo uu ka sii watay waxbarashada heerka sare. Markan
takhasus gaar ah ayuu ka diyaariyay dalka Ingiriiska. Muddo ka dib markii uu
waxbarashadii takhasuska soo dhammeeyay waxa uu ku soo laabtay dalka, Dugsigii
Hoose/Dhexe ee Boodhinka ah ee magaalada Gebilay ayuu maamule ka noqday.
Xilligii
Gumeysiga iyo Cumar
Waqtigii dhulka Soomaalida gaar ahaanna Soomaalilaan uu
gumeysigu haystay Cumar waxa uu ka mid ahaa dadkii ugu cadcaddaa ee gumeystaha
dhagartiisa ka hortagay. Waxa la xusaa inuuna Cumar ahayn qof u jajaban
gumeystaha. Waxa uu ka mid ahaa dadkii xorriyadda doonay ee gumeysidiidka ahaa.
Waxa uu safka hore kaga jiray dadkii gumeystaha ka saaray ee la diriray.
Siyaasadda iyo Cumar
Cumar, waxa uu ahaa siyaasi ruugcaddaa ah. Waxa la xusaa inuu ahaa dadka mabda’a iyo
isbeddelka ugu jiray siyaasadda, balse aan hunguriga iyo xilka ugu jirin. Taas
waxa caddaynaysa Cumar isaga oo yar ayuu siyaasadda ku biiray. Waxa uu ka mid
ahaa rukunnadii iyo odayadii Soomaalilaan markii ay SL xorriyadda qaadatay.
Markii uu midawda Soomaalilaan iyo Soomaaliya uu dhacay waxa uu ka mid ahaa
siyaasiyiintii nusdanbeeka ahaa.
Sannadkii 1969kii markii Siyaad Barre dalka la wareegay
Cumar waxa loo magacaabay Wasiirka Wasaaradda Arrimaha Debadda Soomaaliya. Muddo
badan ayuu hayay, laga bilaabo sannadkii 1969kii illaa 1976kii ayuu ahaa
Wasiir. Waxa la xusaa intii uu Wasaaradda Arrimaha Debadda uu joogay inuu
waxbadan qabtay, Wasaaraddana kiciyay oo meel la majiirto gaadhsiiyay. Intii uu
Wasaaraddaas joogay waxyaabaha uu qabtay waxa aynu ka xusi karnaa, Qaramada
Midoobay ayay Soomaaliya si heersare ah uga dhex muuqatay, oo Cumar waxaaba loo
doortay Madaxweynaha Golaha Ammaanka Qaramada Midoobay. Sidoo kale, waqtigaas
waxa uu Cumar qayb laxaad leh ka qaatay sidii Soomaaliya ugu biiri lahayd
Jaamacadda Carabta oo waxa la yidhaahdaa “ Waa Wasiirkii Soomaaliya ku daray
Jaamacadda Carabta.”
Sidoo kale, intii uu Wasaaradda Arrimaha Debadda hayay waxa
uu dhexdhexaadiyay oo nabadeeyay dalka Yugaandha, iyo Tansaaniya ka dib markii
uu ka dhex qarxay dagaalkii labadaas dal u dhexeeyay. Dagaal lagu hoobtay ayay
labadaas dal iskaga horyimaaddeen. Cumar kaalin wayn oo muuqata ayuu
waanwaantii labadaas dal ka qaatay.
Waqtigii Dawladda Kacaantu talinaysay Wasiir Cumar Carte iyo
16 siyaasi oo kalaba inta xasaanaddii ay hayeen laga qaaday ayaa la xidhay.
Cumar, muddo 7 sano ah ayuu jeel ku
jiray bilaa xukun, haddana Maxkamad ayaa la taagay oo waxa lagu xukumay dil.
Balse, dilkii ma dhicin oo waxa baajiyay cadaadis badan oo dawladda kaga yimid
beesha caalamka iyo Hay’adaha u dhaqdhaqaaqa Xuquuqda Bini’aadanka. Dilkii waxa
loogu baddelay xabsi iyo xadhig. Xabsi guri ayaa muddo lagu hayay.
Markii xabsiguri laba sano uu ku xidhnaa laga sii daayay waxa
loo magacaabay Raysalwasaarihii Dawladdii
Dimuqraaddiga ee Soomaaliya, waxaana magacaabay Maxammed Siyaad Barre. Haddana marlabaad
ayaa loo doortay oo Raysalwasaare. Muddadii kalaguurka ahayd ayuu Raysalwasaare
ahaa.
Cumar Carte, muddo badan ayuu ahaa Safiirka Soomaaliya u
fadhiya dalka Itoobbiya. Muddadii uu safiirka uu ahaa shaqooyin
diblomaasiyadeed oo lagu xasuusto ayuu qabtay. Waxa la xusaa inuu ahaa ‘ Ninkii
kelidii u babacdhigay dawladdii Itoobbiya.’
Danjire Cabdillaahi Axmed ( Koongo), oo ka tirsanaa safaaraddii
Itoobbiya ee Cumar Carte Safiirka ka ahaa ayaa mar BBC da u sheegay intan: “
Cumar waxa uu ahaa nin waddaniyaddiisa iyo Diintiisaba ku dheggan. Cumar, waxa
uu ahaa ninkii dawladda Itoobiya u babacdhigay isaga oo kelidii ah. Wuxuu ahaa
ninkii kali ahaa ee diiday inuu u sujuudo Xayle Salaase. Marka Danjire kastaa
qaabilayo waa inuu saddex jeer u sujuudo, ka dibna noqdaa. Balse, Cumar wuu
diiday wuxuuna yidhi ‘ taasi ma dhacayso, anigu cid aan Alle ahayn u sujuudi
maayo.’
Ka dib markii dawladdii Soomaaliya dhacday ee dalkii la wada
lahaa burbur iyo barakac ku yimid Cumar Carte waxa uu ku soo laabtay
Soomaalilaan, oo iyaduna madaxbannaanideedii dib ugala soo noqotay Soomaaliya.
Cumar, waxa uu ka qaybqaatay dib u heshiisiinta Beelaha Soomaalilaan, waxaa
uuna ka qaybgalay shirarkii dibudhiska Soomaalilaan. Shirarka uu ka qaybgalay
waxa aynu ka xusi karnaa shirkii Boorama lagu qabtay sannadkii 1993kii.
Cumar Carte, waxa uu isku dayay inuu Soomaalilaan hoggaamiyo
oo horumar gaadhsiiyo. Waxa uu doonay inuu madaxwayne ka noqday. Cumar,
sannadkii 1993kii waxa uu u tartamay madaxtinnimo. Waxa uu la tartamay Maxamed Xaaji
Ibraahin Cigaal. Calaf dartii Cumar Carte kuma guulaysan madaxtinnimada.
Dalka debaddiis ayuu muddo ku maqnaa. Sannadkii 2002dii ayuu
soo laabtay. Markaas Soomaalilaan Xisbiyada Qaranka ayaa la furay. Cumar Carte,
waxa uu furtay xisbi lagu magacaani jiray ‘ Hormuud.’ Xisbigii muddo ayuu
shaqeeyay, balse kama mid noqon saddexdii Xisbi Qaran ee la rabay.
Noloshii
danbe ee Cumar
Intii danbe ee noloshiisa Cumar Carte, waxa uu ahaa siyaasi
ruugcaddaaya iyo oday nabadeed arrimaha masiiriga ah wax laga wayddiiyo. Waxa
uu ahaa oday wax laga wayddiiyo arrimaha jira, oo nabadaynta, xallinta
khilaafaadka, iyo arrimaha adkaada wax laga wayddiiyo. Sidoo kale, waxa uu ahaa
siyaasi lafdhabar ah oo arrimaha Soomaalida oo dhan wax laga wayddiiyo. Dhinaca
kale, waxa uu ahaa kayd iyo qaamuus taariikhda Soomaalida iyo sooyaalkii hore
wax laga wayddiiyo. Hadalka oo kooban waxa uu ahaa oday nusdanbeed iyo
lafdhabar u ah arrinkasta oo masiiri ah.
Ugu danbayn waxa uu Cumar Carte geeriyooday Noofanbar 18, 2020. Waxa uuna ku geeriyooday
magaalada Hargeysa oo uu muddooyinkii danbe ku xanuunsanayay. Alle ha u
naxariisto. Qaamuus dhan, Diblomaasi, iyo Macalliyad siyaasadeed ayaa
maalintaas ummadda Soomaaliyeed ka baxay. Alle ha u naxariisto.
Xigashooyin
1-
Bbc Soomaali: https://www.bbc.com/somali/war-54988909
2-
https://en.wikipedia.org/wiki/Umar_Ghalib
W/Q: Cabdirisaaq Sandheere
Noofanbar 18, 2021.
Boorama, Somaliland.
ustaad, Qoraalka waxaa ka maqnaa tifaftir badan, waxaana ka muuqatay degdegsiimo badan. xog way xambaarsanayd, balse taa daanka ka tuuraysay.
ReplyDelete