Gorfeynta Buugga “Oral Poetry and Somali Nationalism ~ Gabayga iyo Wadanniyadda Soomaalida.”
Hordhac
Buuggan
magaciisa la yidhaa “Oral poetry and Somali nationalism: In Case of Sayid
Mohamed Abdulle Xasan~ Gabayga iyo Wadanniyadda Soomaalida: Sayid Maxamed C.
Xasan muunad ahaan.” Waxa qoray Siciid Sheekh Samatar. Siciid, waxa uu ahaa
aqoonyahan, iyo sooyaalyahan Soomaaliyeed. Sannadkii 1943kii ayuu deegaanka
Soomaalida ku dhashay. Yaraantii waxa uu ku soo kacaamay xooladhatannimo. Isaga
oo muddakar ah ayuu waxbarashada bilaabay oo aabbihii u diray Magaalada
Qallaafo. Halkaas ayuu muddo wax ka baranayay. Waxbarashada dugsiyada waxa uu
ka dhammaystay Itoobbiya.
Jaamacadda
qaybta koowaad, waxa uu ka bartay ‘Goshen College’ oo Hindiya ku yaalla, wuxuu ka
baxay Kulliyadda Taariikhda ‘history and literature.’ Shahaadada labaad ee
Masterta waxa uu bartay Taariikhda Afrikaanka. Sannadkii 1979kii ayuu
Shahaadada P.hD ka qaatay Jaamacadda ‘Northwestern
University’ oo ku taalla Evanston, Illinois. Wuxuunna ka bartay Taariikhda
Afrika. Wuxuu caawiye Baroofaseer ka ahaa Jaamacadda Rutgers University.
Wixii
intaas ka danbeeyay waxa uu ku hawlanaa Taariikhd Afrika guud ahaan, gaar
ahaanna ta Soomaalida. Waxa uu xubin sare ka ahaa ururka ‘Somali Studies
International Association’ illaa iyo 1979kii. Waxa uu muddo tifaftire ka ahaa
Joornaalka ‘Horn of Africa journal.’ Waxa uu lataliye sare u ahaa ‘Bildhaan:
An International Journal of Somali Studies.’ Sannadkii 1995kii, isaga iyo
Ismaaciil Cali Ismaaciil, waxa ay ka qaybqaateen qoraalkii Dastuurka Dalka
Elatariya.[1]
Warbaahinta kaladuwan kuwa maxalliga ah, iyo kuwa lookalka
ah ayuu ka hadli jiray, oo barnaamijyo ka sii dayn jiray. Qoraallada uu qoro
Siciid, waxaa xigan jiray Jaraa’iddada caalamiga ah sida Newsweek, U.S. News & World Report, The New York Times iyoThe Washington Post.[2]
Qoraallo aqooneed oo aad u farabadan ayuu Siciid qoray. Waxa
ka mid ah maqaallada uu qoray:
1- Oral poetry and
political dissent in Somali society : the Hurgumo series", Ufahamu: A
Journal of African Studies, 1989.
2- How to Run an SNM
Gauntlet", Horn of Africa, 13, Nos. 1-2, April–June 1990,
78-87.
3- "The Search for
Political Accountability in African Governance: The Somali Case"., African
Governance in the 1990s (Atlanta: The Carter Center, 1990),
pp. 165–168.
4- "How to Save
Somalia", Washington Post, December 1, 1992, A19.
5- "The Politics
of Poetry", Africa Report (September/October 1993), pp. 16–17.
6- "Remembering
B.W. Andrzejewski: Poland's Somali Genius", 1998.
7- "'Sarbeeb' :
the art of oblique communication in Somali culture", Wardheernews Online
8- "Unhappy masses
and the challenge of political Islam in the Horn of Africa", Horn
of Africa, 2002.
9- "An Open Letter
to Uncle Sam: America, Pray Leave Somalia to Its Own Devices", Journal of
Contemporary African Studies, July 2010, Vol. 28, Issue 3, pg 313-323.
Buugaag badan ayuu qoray. Waxa ka mid ah:
1-
Somalia: nation in search of a State (co-author:
Laitin, David D.). Westview Press, 1987.
2-
Somalia: a nation in turmoil. Minority Rights
Group, 1991
Buuggan
maanta innoo qalan, waxa uu kaga warramayaa sida ay Soomaalidu gabayada iyo
aftahamada ugu adeegsan jirtay Wadaniyadda.
Waxa uu tusaale u soo qaadanayaa gabayaagii, halgamaagii, iyo waddanigii waynaa
ee Sayid Muxammed Cabdalle Xasan. Buugga si kooban ayaynu u soo koobi.
Buuggu waxa uu ka midyahay
taxanayaasha Afrika ‘ African Studies’ waana buuggii 32aad. Wuxuu ka koobanyahay 248 bog. Buugga waxa uu
daabacay 1982kii. Waxaanna daabacday Cambridge University Press.
Nuxurka Buugga
Hordhaca
qoraagu waxa uu ku xusayaa Soomaalidii hore ee xooladhaqata ahayd sida ay
gabayga u adeegsan jirtay. Waqtiyadaa magaalowgu a jirin, dadku Miyi ayay degganaayeen.
Saamayn aan la dhayalsan karin ayuu gabaygu ku lahaa. Dhinacyo kaladuwan ayaa
laga eegi karaa. Se gabayga waxa ay u adeegsan jireen:
1-
Faanka: oo labadii qof ee isku faanayaa
gabay ayay iskugu faani jireen.
2-
Dagaallada ayaa lagu qaboojin jiray:
Haddii laba qabiil islaayaan waxa ugu badan ee lagu heshiisiin jiray waxa uu
ahaa gabay.
3-
Wadaxidhiidh, farriin.
Haddaba
waxa aad mooddaa in gabaygii sidaa loo adeegsan jiray, markii Siyaasadda iyo
dhinaca xifaaltanka laga eego aad loo adeegsado. Qoraagu waxa uu xusayaa inuu
yahay hub ay siyaasiyiintu isku adeegsadaan, oo nin ba ninka uu ka gabayo
badanyahay shiiqinayo. Gabaygu aftahannimo ayuu xidhiidh la leeyahay ama
sheegaa.
Bilowga,
qoraagu waxa uu ladh uga dhigayaa “ Waxyaabaha ay ka koobantahay Aftahannimada
Soomaalida Xooladhaqatada ahi.” Waxa uu kaga warramayaa aftahannimada ay
Soomaalidu la gaar ka tahay, iyo waxa ay ka koobantahay.
Judha
horaba waxa uu ku doodayaa in Soomaalidu ajaanib badan oo ay ka midyihiin Richard Burton, M. Maino, Margaret Laurence, B. W. Andrzejewski
iyo I. M. Lewis ku sheegeen ‘ Dadkii gabayga.’ Dhammaan nimankaas ajaanibka ahi
Soomaalida waxbay ka qoreen, waxa ay aad ugu doodaan inay Soomaalidu gabayada
ku horreeyaan, ummadaha kalana ku shiiqiyeen, afkooduna hodan ku yahay, fuf
badanna ku hayo.
Geela, ayuu qoraagu soo qaadanayaa. Geelu
duruufaha adage e Soomaalidu ku nooshahay waa ka ugu adkeysiga badan. Deegaan
kulul oo biyuhu ku yaryihiin ayuu ku dhexnoolyahay. Geelu waa xoolaha ugu adkaysiga
badan ee muddo badan aan biyo cabin. Geelu Soomaalida muhiimad badan ayuu u
leeyahay. Waa xoolaha ugu mudan Soomaalida. Ka sokow dhaqaale ahaan, waxa uu u
yahay faan, iyo qurux.
Qoraagu waxa uu dhufsaneyare ka dhexaysiinayaa
gabayga iyo geela. Waxyaabaha ay Soomaalidu aad ka ugu gabaydo, kuna halqabsato
waxa ka mid ah geela. Waqtigii Midawda ee ay midoobeen Soomaaliya iyo
Soomaalilaan, waxaa xornimadaa loo bixiyay magac haleed ‘ Maandeeq.’ Maandeeq
waa magac loo bixiyo geela dheddig. Waxa ay ku tusinaysaa sida ay muhiimadda
ugu tahay Soomaalida dhexdeeda, geelu.
Isla magacaas ‘ Maandeeq’ waxaa loo bixiyay
Gabay uu tiriyay Alle ha u naxariistee Abwaan Cabdillaahi Timacadde, oo uu kaga
warramayay Xornimada. Gabay iyo geelu
meelo badan ma kala maarmaan. Qoraagu halkan waxa uu inna tusinayaa sida ay
saamaynta iskugu lahaayeen Geela iyo gabaygu. Abwaan Sayid Maxammed Cabdulle
gabayo badan oo uu geela ku soo halqabsanayo, ama kaga warramayo ayaa iyaguna
jiray.
Waxa iyaguna xusida mudan Fardaha. Qoraagu sida
uu xusayo Farduhu saamayn ayay ku leeyihiin Gabayada. Waa waxyaabaha Gabayada
Soomaalida ku jira ee abwaannadu ku halqabsadaan ama ammaanaan. Tusaale ahaan,
gabaygii ay ku tartamayeen Raage Ugaas, iyo Sayid Maxammed Cabdulle ee ay kaga
warramayeen Farasyadooda.
Qoraagu waxa uu xusayaa in gabaygu qayb ka ahaa
‘ Godobta.’ Godobaha kaladuwan ee dadku kalagalaan inay ku kala aargoostaan
gabay ayay isku dayi jireen. Dhinaca tirinta gabayada ku saabsan godobta, iyo
aanooyinka la kala galo aad bay Soomaalidu qani ugu tahay. Godobtu labo ayay
ahayd:
1-
Mid dhiig,
ama dhaawac la kala galay.
2-
Mid hadal
ama afka uun wax la iska yeellay.
Xooladadhaqata Soomaalidu waxa ay caan ku
ahaayeen inay geedaha hoostooda ku shiraan, oo ku dhammaystaan hawlo badan.
Waxyaabaha ay geedaha hoostooda ku qaban jireen waxa ka mid ahaa; xukunka,
dhexdhexaadinta, shirarka, isku imaatinka, ciqaabta IWM. Qoraagu waxa uu
xusayaa marka geedaha la fadhiyo waxa kulanka hoggaamin jiray saddex midkood;
codkarka, gabayaaga, iyo xeerbeegtida. Saddexdani oo ah kuwa ugu aftahansan ee
afkooga maalaya. Waxa se ku dhexjira shirka guddoomiye iyo doodqaad. Marka
koowaad, waxaa shirka fura guddoomiyaha oo yidhaa ‘ Toloow, hala I maqlo.’ Waxaa
ku xiga doodqaadka oo u dhexeeya guddoomiyaha iyo dhegaystayaasha. Waxa ku xiga
gabayaaga, oo isagu gabay meesha ka tiriya, kuna hurgufa fadhiga
aftahannimadiisa. Qoraagu waxa uu halkan ku adkaynayaa in gabayaagu saamayn
wayn ku lahaa shirarka, iyo isku imaatinka.
Erayada loo adeegsado qofka hadalyaqaanka ah
ayuu qoraagu ka xusayaa. Saddex ayaa ugu waawayn, inkasta oo iyaguna ay sii
kala sarreeyaan, oo derejo kala leeyihiin. Waxa ay yihiin; afmaal, aftahan, iyo
afmiishaar.Waxa ugu derejo sarreeya afmaal, oo ah qofka afku hanti uu wax ku
goosto u yahay. Waxa ku xiga aftahan, oo ah qofka afku sharaf u yahay. Waxa ku
sii xiga afmiishaar oo ah ka afku wax u gooyo, inta badanna cidda uu doono ku
dhaawaca, ama ku sumcad xumeeya.
Waxa kale, oo qoraagu leeyahay laba shay ayay
Soomaalidu faceeda kaga horraysaa dhinaca xidhiidhka bulshada:
1-
Awoodda ay kaga dhaadhicinayaan waxa ay
rabaan.
2-
Awoodda ay wax ku xasuustaan.
Qoraagu
waxa uu waxoogaa ka warramayaa “ waxyaabaha ay Soomaalidu gabayga u adeegsan
jirtay?”Sababo badan ayay u adeegsan jirtay gabayga Soomaalidu. Waxyaabaha ay u
adeegsan jirtay waxa ka mid ah:
1-
Farriin: Marka ay doonayaan inay farriin
meel u diraan gabay ayay ugu diri jireen. Waqtiyaa ma jirin waxyaabo cusub oo
wax la iskugu diraa. Dhinaca kale lama aqoon qoraalka oo cidda taqaan way
yarayd.
2-
Heshiisiin: Marka ay laba beelood
islaayaan waxa lagu heshiisin jiray gabayada ayaa ka mid ahaa.
3- Xifaaltan, iyo faan: Golayaasha iyo meelaha la iskugu yimaad ayaa la isku tuurtuuri jiray kaftan, oo waqti lagu wadaqaadan jiray.
Gabaygu
waxa uu lahaa Miisaan u gaar ah, waxyar ayuu qoraagu ka xusayaa. Qaabadhac u
gaar ah ayuu leeyahay gabaygu. Miisaanka Maansada nimankii soo saaray waxa ay
kala ahaayeen Carraale iyo Gaarriye. Waxa iyadna layaable qaabka ay abwaannadu
u curiyaan. Qoraagu dhawr abwaan oo jaadad kala duwan ka maansooda ayuu soo
qaadanayaa. Waxa ay yihiin:
1-
Cilmi Boodheri, oo jaceylka ku caan
ahaaa.
2-
Sayid Maxammed Cabdulle Xasan, oo
gumeysidiid ahaa, gabayo badanna ka tiriyay.
Sayidku
gabayada waxa uu u isticmaalay waran uu ku gano cidda kolba ka soo horjeedda ee
uu damacsanyahay. In badan ayuu gumeystaha ku eryanayay, oo dhegaha kaga tumay.
Markii uu jebiyayna ku sii diganayay. Markii uu dhintay Sargaalkii Ciidamada
Ingriiska hoggaamin jiray ee Koofidh, Sayid Maxammed Cabdulle Xasan gabaygii uu
tiriyay waxa uu ahaa:
Adaa
koofilow jiitayaan dunida joogeyne
Adigaa jidkii lagugu wadi jimic-la’aaneede
Jahannamo-la-geeyow haddaad aakhiruu jahato;
Nimankii januu kacay war bay jirin ishaalleeye
jameecooyinkii iyo haddaad jowhartii aragtid
Sida eebbahay kugu jirrabay mari jawaabteeda;
Daraawiish jikaar nagama dayn tan iyo jeerkii
dheh
Ingiriis jabyoo waxaa ku dhacay jac iyo baaruud
dheh
Waxay noo janjuunteenna waa jibashadiinii dheh;
Anigana jigray ila heleen shalay jahaadkii dheh
Jigta weerar bay goor barqo ah nagu jiteeyeen
dheh
Jeeniga hortiisay rasaas igaga joojeen dheh;
Jiiraayaday ila dheceen jilic afkoodii dheh
Siday kuugu jeexeen magliga jararacdii sheego
Billawuhu siduu kuu jarjaray jeerarka u muuji;
Naf jeclaysigeed baan u iri jaaloow iga daa dheh
Jaljalleecadii baa wadnuhu jeebka soo ruqay dheh
Jeedaaladii baa indhuhu kor u jillaadmeen dheh;
Jimic kagama helin tuugmadaan jeriyey ruuxii
dheh
Kolkaan juuq iraahdaba afkay iga jifeeyeen dheh
Dhaaxaan jaleecaye dheg baan jalaq la ii siin
dheh
Goortaan jarreerona gefoo nolol ka jaanqaaday
Sida jananaddii hore tashigu igu jaguugnaa dheh
Taladii jinnigu ii hormaray jaasadeed helay
dheh;
Jiidaha xanuunkq leh markii la igu jeeraarshay
Jibaadka iga soo baxay dadkii jiifka qaban waa
dheh
Kolkay rubaddu jow!tiri or bay iga ag jiibsheen
dhah;
Jiirkayga bahal baa cunoo jiitay hilibkii dheh
Jurmidiyo baruurtii dhurwaa jugux ka siiyaa dheh
Jiljillaadiyo seedaha tukay igaga jaadeen dheh;
Haddaan lays jikaareyn tolkay laga jilroonaa
dheh
Waligoodba waa lagu jiraa jilibdhig duullaan
dheh
Sayidkiina waa jibindhawgiyo jowda soo bixi dheh
Qoraagu
qeybta xigta waxa uu ku eegayaa ‘ Soo ifbixiddii Daraawiishta.’ Daraawiishtu
waxa ay ahaayeen Ciidan Soomaaliyeed oo loo sameeyay si loola dagaallamo
gumeystihii dalka xukumayay, ee kheyraadka ummadda gurtay. Waxa aasaasay, oo
abaabulka lahaa Sayid Muxammeed Cabdille Xasan. Rag kale oo badan oo Ismaaciil
Mire ku jiro ayaa ka mid ahaa. Waqtiga la aasaasay waa dhammaadkii qarnigii
19aad. Meelaha laga aasaasay waa waxa ay ahaayeen gobollada Sool/Sanaag. Waxaa
fadhiisin u ahaa meelo kaladuwan oo Taleex ka mid ahayd. Fekerku jihaad ayuu
ahaa. Ragga watay Suufiyo ayay ahaayeen.
Halgan adag inay galeen ayuu qoraagu aad u xusayaa.
Sayid
ayuu Sooyaalkiisa inyar qoraagu ka xusayaa. Sayidku wuxuu dhashay 1864kii, se
dad uu ka midyahay Qoraa Aw Jaamac ayaa sheegay inuu dhashay 1965kii. Wuxuu ku
dhashay meel u dhexaysa Buuhoodle iyo Widhwidh. Meelo badan oo ay ka midyihiin
Herer, Suudaan iyo Nayroobi ayuu maray. Xashka ayuu tagay oo wuxuu raacay Sheekh Maxammed. Halkaas
muddo ayuu joogay oo waxa la sheegaa in uu Sheekhii Dariiqada Saalixiyada
Ijaaso ka soo qaatay. Dalka ayuu ku soo laabtay oo Berbera ayuu ka soo degay.
Markii uu Berbera ka soo degay waxaa cashuur wayddiiyay gumeystihii Ingiriis!
Sayidku wuu diiday, oo wuxuu ku yidhi: “ Ad ba markii aad imanaysay yaa cashuur
kaa qaaday?” Ciddii u kala turjumaysay ayaa u sheegtay in Wadaadkani
waalanyahay, halkaasna waxa ay kaga nabeen naanaystii ‘ Mad Mullah ~ Wadaadkii
Waalnaa.”[3]
Se qoraa Siciid Sheekh, wuu ka duwayaa oo wuxuu sheegayaa in Wadaadka Waalan ay
u bixiyeen dad ka mid ah Wadaaddadii dariiqada Saalixiyada.
Qoraagu waxa uu sheegayaa in Sayid Muxammed Cabdille Xasan saddex astaamood
Nebi Muxammed kala mid ahaa. Aragtidan uu Qoraa Siciid qabo, waxa uu sheegayaa
in ay qabeen Qoraayo Soomaaliyeed oo ay ka midyihiin Sheekh Jaamac, Cumar
Ciise, Cabdalle Riiraash. Astaamahaasi waa:
1-
Magaca wuu kala mid ahaa, oo ka
sinnaayeen.
2-
Da’da isku mid ayay ahaayeen, marka aynu
eegno da’da lagu soo diri jiray Nebiyada ayuu Siciid leeyahay.
3-
Jihaadka ayay ka sinnaayeen.
Qoraagu,
waxa uu qabaa in Sayid Maxammed Cabdille, uu ahaa nin afkiisa ku ciilbaxay oo
aad ugu dagaallamay. Waxa uu ku sheegayaa inuu ahaa ‘ Afmaal siyaasadeed’ ama ‘
siyaasi afmaal ah.’ 20kii Sano ee ay
Daraawiishtu dagaallamaysay Sayidku wuxuu soo saaray gabayo badan. Qoraa
Siciid, waxa uu sheegayaa in Sayid Maxammed gabayada ugu badan tiriyay intii uu
Daraawiishta hoggaaminayay, gaar ahaanna intii u dhexaysay 1905kii 1920kii. Dadkii
raacsanaa qaar ayaa odhan jiray ‘ Waa lagu soo degaa.’ Iyaga oo la yaabban
gabayada uu tirinayo nuxurkooda, iyo u jeeddadooda ballaadhan.
Gabayada
dhiirrigelin ayuu u adeegsan jiray, oo ciidamadiisa iyo dadka ayuu Sayidku ku
tirtirsiin jiray. Qoraagu waxa uu si dadban u tilmaamayaa sababta Sayidka u
saamaxday inuu gabaygiisii u adeegsado hub siyaasadeed, oo cidda uu rabo kaga
aargoosto. Waxa uu sheegaayaa:
1-
Sayidku waxa uu ahaa dadka ay Soomaalidu
u taqaanno waaya’arag. Khibrad badan ayuu lahaa, oo waxa uu garanayay waxa uu
odhanayo, halgankiisan Daraawiishtu sida uu u socdana wuu ka warqabay.
2-
Waxa uu ahaa nin aad u wax u bartay oo ku
nool dal ay dadkiisu u badanyihiin Jaahiliin, dhinaca kale, wuxuu ka dhisnaa
aqoonta Diinta oo si wanaagsan ayuu u yaqaannay, cidkastana wuu la doodi
karayay.
3-
Af Soomaaliga si wanaagsan ayuu u
yaqaannay, oo erayada ayuu hodan ku ahaa, si wanaagsanna wuu u adeegsan jiray.
Sababahaas
ayaa ka dhigay marla’arag eraygiisu meel maro, ayuu qoraagu leeyahay. Qoraagu
waxa uu leeyahay “ Soomaali badan sida ay u aragto Sayid Maxammed erayadiisu
AWOOD ayay lahaayeen oo qofka uu doono wuu ku DILI jiray, ka uu doonaan wuu ku
noolayn jiray.”
Astaamaha
lagu garan karo Sayidku inuu hoggaamiye ahaa waxa ka mid ah:
1-
Wuxuu ahaa nin adkeysi leh.
2-
Awood ruuxeed ayuu lahaa.
3-
Wuu dhiirranaa.
4-
Aftahan ayuu ahaa.
Meelo
badan ayuu Sayidku ka gabyi jiray. Waxa ka mid ahaa; farriinta, waxsheegga ama
ka dhaadhicinta, weerarka, habaarka, kicinta dadka IWM. Sayidka waxaa laga
ururiyay oo hadda laga hayaa illaa 120 gabay. Saddex qaybood marka loo qaybiyo
laba qaybood waxa ay ka hadlayaan dagaal, weerar IWM, ayuu qoraagu leeyahay.
Meelaha ugu danbeeya qoraagu Sayidka ayuu
waxoogaa ku ammaanayaa, oo sifooyinkiisii wanaagsanaa, iyo waxa laga baran karo
si goosgoos u qadhiidhayaa. Sayidku nin saamayn leh ayuu ahaa, ayuu leeyahay.
Afkii uu ku dagaaami jiray waqtigaa hadda ayaa lagu dagaallamaa dawladnimada
casriga ah, oo siyaasiyiintu marka ay arrin aragti ka dhiibanayaan, marka ay
wax dhalliilayaan, iyo marka ay hadlayaan ba af ayay adeegsadaan. Xilligan waa
laga tagay qorigii iyo rasaastii. Af iyo erayo ayaa la isku gummaadaa.
Ugu
danbayn qoraagu waxa uu tusaale uga soo qaadanayaa aftahannimadii Sayidka iyo
jaadgoonninimadiisii. Sayidku Wadaad Suufiya oo Suufinnimada ku adag, ayna
waxbadan u tartay ayuu ahaa. Dhinac kale, aftahan erayadiisa laga gabbado ayuu
ahaa. Dhinac kale, siyaasi afka wax ku weerara ayuu ahaa. Dhinac kale,
hoggaamiya dadka horkaca oo wax haga ayuu ahaa.
Maxaynu Buugga ka baran
karnaa?
1-
Soomaalidu sida ay aftahannimada,
gabayada iyo awoodda hadalka caanka ugu tahay. ‘
2-
In hadalku saamayn leeyahay oo marar
badan waxyaabo kale ka badiyo.
3-
In aftahannimada, iyo afmiishaarnimada
wax lagu hagi karo.
4-
In hoggaamiyaha lagamamaarmaan ay u tahay
aftahannimada.
5-
In gabayadu meel xeeldheer kaga jiraan
Soomaalida.
6-
In gabayadu aftahannimada qayb laxaadle
ka qaataanaa.
7-
In Sayidku ahaa Siyaasi iyo hoggaamiye
waqtigu tababbaray, oo wax laga baran karo.
Dhaliisha Buugga
1-
Dhinaca taariikda Sayidka ayuu u badiyay
qoraagu buugga, waxa ay ahayd inuuna sidaas ugu sii dheeraan, maadaama aannu
buuggu ahayn sooyaal lagaga warramo Sayid.
2-
Waxyaabo la xidhiidha aftahannimada oo
Soomaalidu caan ku tahay ayuu ka tagay, oo aannu qorin qoraagu.
Gebagebo
Buuggu
aftahannimada Soomaalida, kaalinta ay ku jirto ayuu ka warramayaa. Si kooban
ayaynu usoo sheegnay saamaynta gabayga, iyo kaalinta uu ku leeyahay bulshada.
Waxa kale, oo aynu soo sheegnay Sayid Maxammed iyo halgankiisii, iyo
kaalintiisii. Intaas ayaan ku soo afmeerayaa.
W/Q: Cabdirasaaq
Sandheere
Boorama, Awdal
Juun, 2020.
Comments
Post a Comment