Sooyaalka Asxaabta: Anas Binu Maalik Al Ansaari (1)
Anas, isaga oo yar ayay Hooyadii Shahaadataynka u laqintay.
Mararka qaar dhegtu wax ay maqashay ayay caashaqdaa, oo aragtidaba way ka
horraysaa. Anas, isaga oo aan arag ayuu Nebi Muxammed Jaceyl u qaaday. Anas,
Madiina ayuu ku noolaa waqtigaa, Nebi Muxammed na SCW magaalada Maka.
Hijradii Nebi Muxammed ayaa dhacday, oo Nebigu Madiina ayuu
u soo hijrooday. Waa hoygii Anas. Anas, jaceyl ayuu sii dareemay markuu maqlay
in Nebi Muxammed Madiina imanayo. Carruur iyo cirroolaba waa la soo dhaweeyay
Nebi Muxammed. Asxaabtii soo dhawaysay kuwii soo hijrooday waa tii magaca ‘
Ansaar’ loo bixiyay. Anas walow uu yaraa haddana wuu soo dhaweeyay.
Markii uu Madiina waxyar joogay Nebi Muxammed SCW, ayay Anas
Hooyadii Qumaysaa u timid Nebiga iyada oo inankeedii Anas la socdo. Waxa ay ku
tidhi: “ Rag iyo dumar laguuma kala hadhin, anigu Inankaygan Anas ayaan kuu
wadaa. Kaxayso ha kuu shaqeeyo, oo waxa aad doonto ha kuu qabto.” Nebigu, wuu
farxay, Anas ayuu madaxa ugu salaaxay gacantiisii sharafta lahayd.
Anas, waqtigaa uu Nebi Muxammed raacay wuxuu ahaa 10 sano
jir. Halkaas ayuu madarasaddii Rasuulka SCW kaga biiray. Muddo badan ayuu
Diinta ka baranayay, Axaadiisatana ka warinayay. Nebiga illaa intii uu
dhimanayay wuu la noolaa. 10 sano markii uu la joogay ayuu Nebigu dhintay SCW.
Intii uu la noolaa dhaqan wanaagsan ayuu kala kulmay.
Anas, wuxuu ka sheekeeyay Qiso isaga iyo Nebi Muxammed
dhexmartay. Wuxuu sheegay in maalin Nebigu meel u diray. Dabadeedna, uu arkay
carruur ciyaaraysa. Wuu yaraa, oo waqtiga ay carruurtu yaryihiin ciyaarta ayay
jecelyihiine Anas carruutii ayuu ku leexday oo ciyaartii ayuu la bilaabay.
Markii ciyaartu dhammaatay, ayuu arkay nin dabataagan. Wuu eegay, waaba
Rasuulkii SCW oo dhoollacaddaynaya. Nebiga ayaa ku yidhi: “ Anasyarooe, ma
tagtay meeshaan kuu diray?” Markaasuu Anas yidhi: “ Haa. Hadda ayaan tagayaa.”
Anas, wuxuu yidhi: “ Wallaahi baan ku dhaartee, 10 sano
ayaan Nebi Muxammed u shaqaynayay. Wax aan sameeyay ima odhan maxaad u
samaysay. Waxa aan samayn waayayna ima odhan maxaad u samayn wayday.” Dhaqan
wanaagsan, oo ixtiraam, iyo jacel ku dheehanyahay ayuu Nebigu SCW lahaa.
Wuxuu ku dadaali jiray inuu Nebiga qaato wixii uu amray,
wixii uu ka nahiyayna inuu ka tago. Wuxuu Anas, yidhi: “ Laba maalmood ayaan
aad u xasuustaa Nebiga. Waa: maalintii aan la kulmay, iyo maalintii uu
geeriyooday.” Maalinta uu la kulmay markuu xasuusto wuu farxijiray, oo waa
maalintii ugu horraysay ee uu arko qofkii uu jeclaa. Halka maalinta uu dhintay Nebi Muxammed marka uu xasuusto uu
murugoonjiray ee ooyijiray.
Nebigu SCW wuu u duceeyay Anas, oo wuxuu yidhi: “ Allow, ku
arsaaq xoolo iyo carruur, una barakee.” Alle, wuu u aqbalay ducaadaa, oo Anas
wuxuu ka mid noqday Ansaartii kuwii ugu hantida badnaa. Carruur badanna wuu
dhalay, oo waxaa la sheegaa in carruurtii uu dhalay, kuway sii dhaleen ay illaa
100 gaadheen. Da’dana Alle wuu u barakeeyay, oo wuxuu gaadhay 100 sano jir.
Markii uu dhimanayay, wuxuu dardaarmay in Shahaadada loo
laqimo, Nebigana lagu ag aaso. Ballantii waa loo fuliyay. Sidaas ayuu ku
geeriyooday Asxaabigii qaaliga ahaa ee aqalka Rasuulka ku soo barbaaray. Alle
haka raalli noqdo.
Waxa aan ka soo turjumay Kitaabka “ Suwaru in Xayaati
Saxaaba.” Oo uu qoray Sh. Cabdiraxmaan Al Baashaa.
Waa innoo Xalqadda Xigta
Rabadaan, 1441.
Cabdirasaaq Sandheere
Comments
Post a Comment