Bandhigga Buugaagta Jigjiga 2021

Hordhac

Inta badan waan jecelahay inaan magaalooyin badan arko, dhul badanna arko.  Berigii aan yaraa Miyi baan ku soo barbaaray oo socodka iyo inaan meelo cusub arko waan jeclaa. Markasta oo aan fursad u helo inaan meel tago waan tagaa, waana inaan ka faa’idaystaa fursaddaas. Dhammaadkii bishii Juun, 2021ka waxa aan tagay magaalada Jigjiga.Magaaladaas 28keeda waxaa ka bilaabmayay Bandhigga Buugaagta Jigjiga. Bandhiggaas ayaa la igu martiqaaday oo aan martida gaarka ah ka mid ahaa. Sidaas darteed ayaan u tagay magaalada markan. Ma aha markii koowaad ee aan Jigjiga tago, waa markaygii labaad ee aan Jigjiga tago. Sannadkii 2019kii bilowgiisii ayaan markii koowaad booqday.

Qoraalkan waxa aan isku dayayaa inaan kaga warramo Bandhigga buugaagta Jigjiga, iyo waxyaabaha aan ku arkay.

Magaalada Jigjiga

 

25 Juun, 2021kii waxa aan ka baxay magaalada Boorama,  waxa aan u sii jeeday magaalada Jigjiga. Markii aan Jigjiga ku sii socday waxa aan sii maray magaalada Wajaale oo ah magaalo inta badan isku xidha magaalooyin Soomaalilaan ku yaalla iyo Jigjiga. Waqti yar oo kooban ayaan ku sii hakaday Wajaale. Waqti duhur ah ayaan ka baxay Wajaale, aniga oo u sii jeeda magaaladii aan u dan lahaa ee Jigjiga.  Galab gaaban ayaan gaadhay magaalada Jigjiga. Galabta markii aan gaadhay jawigoodu wuu igu cusbaa oo qabaw baan dareemayay.

Jigjiga waa caasimadda Ismaamulka Soomaalida Kililka Shanaad ee Itoobiya. Waa xarunta ay ku kulmaan dhammaan gobollada ay Kililka shanaad ku kulmaan. Si guud, Jigjiga waxa ay ku taallaa dhul daaqsimeed bannaan, buuro kooban ayay hareeraha ku leedahay. Magaalooyin badan ayaa u dhaw Jigjiga oo ay xuduud la leedahay. Jigjiga waxa ay xad dhaw la leedahay Soomaalilaan, wax aan ka badnayn 60-70KM ayay u jirtaa qiyaas ahaan.

Magaalada Jigjiga sannadahan danbe horumar ballaadhan oo dhinac kaste ah. Dhinacyada horumarku ka soo kordhay waxa ka mid ah dhinaca waddooyinka, dhismaha kaabayaasha dhaqaalaha, biriijyada, iyo bilicda magaalada.  Jigjiga koboc badan ayaa ka socda. Dhinaca aad eegtaba waxa muuqda horumar wanaagsan.

Bandhigga Buugaagta Jigjiga

 

Sannadkan 2021ka waxa markii koowaad Jigjiga lagu qabtay bandhig buugeed.  Waa markii ugu horraysay ee bandhig noocan oo kale ah lagu qabto deegaanka Soomaalida.  Bandhiggu wuxuu socday 3 cisho. Wuxuu bilaabmay 28 Juun, wuxuuna dhammaaday 30 Juun. Bandhiggan waxa soo abaabulay oo waqti badan geliyay, xilna iska saaray Abwaan Maxamed-Haldhaa Cabdi oo ah qoraa iyo abwaan suugaanyahan ah oo aad uga shaqeeya dhinaca horumarinta Af Soomaaliga.

Bandhiggu bulshada waa u muhiim. Akhriska iyo qoraalka ayuu lafdhabar u yahay. Wuxuu kobciyaa maskaxda. Wuxuu bilaa bulshada iyo magaalada. Dad badan, iyo marti kaladuwan ayuu magaalada iyo dalkaba u keenaa. Indhaha caalamka guud ahaan iyo indhaha dadka ayuu ku soo jeediyaa.

Sannadahan danbe waxa aad u soo badanaya bandhigyada ka dhaca deegaannada Soomaalida. Magaalooyin badan ayaa qabtay bandhig buugeed illaa hadda. Sannadkasta magaalo ayaa ku soo biirta bandhigyadaa. Sannadkan 2021 waxa Qaddar Alle noqotay in Jigjiga markii koowaad laga qabto bandhig buugeed. Jigjiga dhawr sano horteed bandhig baad jeeddaaye way adkayd sida wax loogu akhriyaa. Maantana meel fiican bay maraysaa, oo waataa bandhig buugeed wayn laga qabanayo.

Waa farxad in Jigjiga bandhig noocan oo kale ah laga qabto. Jigjiga waa magaalo Soomaali kaladuwan oo deegaanno badan oo Soomaaliyeed ka soo jeedda laga helayo. Magaalooyinka kale waxa suurtagala in dad gaar ah ama hal summad wadaaga, isku qabiila ama isku lahjad ahi ku noolyihiin. Balse, Jigjiga way ka duwantahay, oo lahjad kasta iyo qabiiljasta waa laga helayaa.

Bandhiggu si qurux badan ayuu u dhacay. Walow uu bilow ahaa oo qabyo laga helo karo, haddana sida ugu wacan ee waxqabad bilow ahi u dhaco ayuu bandhiggu u dhacay. Waxkasta oo la bilaabayaa marka hore waxbala’aan iyo qabyo ayay ku bilaabmaan, haddii la sii wado ayay midhadhalaan  oo wax loo riyaaqo ay noqdaan.

Waxbadan ayaa lagu soo bandhigay bandhiggan buugaagta. Qaybo qaybo iyo hormo iyo hormo ayaa hadallada  loo asteeyay, dadka ka soo qaybgalayna qaar ba waqti habboon ayaa la siiyay, may ahayn madal furan oo bilaa jadwal ah. Jadwal sugan oo la raaco ayay lahayd.

Bandhigga waxa ka soo qaybgalay dad kaladuwan oo iskugu jiray qoraayo, abwaanno, suxufiyiin, dhaqanyahanno, siyaasiyiin, iyo hal’abuurro da’ yar. Dadkaasi waxa ay kala kala yimaaddeen deegaannada Soomaalida. Deegaannada ay kala yimaaddeen waxa aan ka xusi karaa Hargeysa, Boorama, Boosaaso, Laascaanood, IWM.

Waxyaabaha lagu soo bandhigay waxa ka mid ahaa buugaagta. Buug badan oo ay qoreen dhallinyaro badan ayaa lagu soo bandhigay. Buugta lagu soo bandhigay ee madasha taallay waxa ay ka kala hadlayeen: Suugaanta, dhaqanka, siyaasadda, beeraha, waxbarashada, caafimaadka, dhiirrigelinta, IWM. Buugta mawduucyadaas  ka hadlaysaa waxa ay waxbadan ka baddeli karaan geeddisocodka nolosha, iyo adduunyada.

Waa horumar u soo kordhay Jigjiga iyo guud ahaan Deegaanka Soomaalida. Waa markii koowaad ee Deegaanka Soomaalida Kililka laga qabto bandhig buugeed noocan ah, sannadkan 2021ka.

Intii aan magaalada joogay waxa aan booqday Buurta Kaaramardha. Waxa dalxiiska buurta igu weheliyay qorayaashii iyo ka soo qaybgalayaashii bandhigga buugaagta Jigjiga, 2021. Buurtu waxa ay ku taallaa Jigjiga dhinaceeda, wayna u muuqataa oo inyar oo kooban ayay u jirtaa magaalada. Waa buur qurxoon oo aad u jawi wacan.

 

Gebagebo

Akhriska iyo qoraalku waa muhiim, waxbadan ayay dadka iyo dalkaba ka baddelaan.

Magaalada Jigjiga sannadahan danbe waxa ka jira horumar ballaadhan oo dhinac kaste ah. Dhinacyada horumarku ka soo kordhay waxa ka mid ah dhinaca akhriska,  qoraalka, buugta, maktabadaha, waxbarashada IWM.

 

Julaay, 25. 2021.