Falanqeynta Buugga ‘ Essentials of Argument ~ Seeska Doodda.’
Buuggan ladhkiisa la yidhaa ‘ Essentials of Argument ~
Seeska Doodda ’ waxa uu si guud ka hadlayaa habka wanaagsan ee doodda qofka
arrin ku doodayaa uu u soo bandhigi karo, isaga oo aan ka tagayn dhaqanka bisaylka
ah ee dooddu leedahay. Inta badan in qofku wax cariyo ayay qabtaa gabadha
qoraayaddu. Sidoo kale, waxa ay aad ugu dheeraanayaa faa’idada iyo eesha ay u
leedahay dooddu qofka doodaya iyo ka uu la doodayaba. Waxaa qortay Nancy V.
Wood oo noolayd intii u dhexaysay (Juun 20, 1936 – Maarij 12, 2013), oo ahayd
Qoraa, Abwaan iyo Sawirqaade Maraykan ah. Waxa ay aad ugu caan ahayd qoridda
sheekooyinka gaar ahaan, iyo qoridda qoraallada aqooneed guud ahaan. Hadda
mawdduucan doodda ku saabsan kan keli ah kuma madi ahee waxaa jiraa buugaag
badan oo ay ka qortay ‘ Doodda.’ Buugtaa waxaa ka mid ah; ‘Perspectives on Argument, iyo
Writing Argumentative Essay’ oo isla mawdduucan hadda buuggani daaranyahay la xidhiidha.
Nancy,
buuggan waxa ay qortay sannadkii 2005tii. Buuggu wuxuu ka koobanyahay 291 bogg.
Waxa uu ka koobanyahay saddex qaybood oo aad u ballaadhanm, saddexdaa qaybood
waxaa soo hoosgalaya illaa Toban Cutub oo aan iyaguba yarayne aad u cufan.
Marka
koowaad, Nancy waxa ay iswayddiinaysaa ‘ Waa maxay Doodi? Maxaynnu u barannaa
doodda, sabab?’ qeexitaanno badan ayay ‘ Dood’ waxa ay tahay ka bixinaysaa, mid
ka mid ahi waxa weeyi ‘ Waa laba aragtiyood oo isku liddii ah, oo laba qof ama
wax ka badan kala taageersanyihiin oo arrin lagu kaladuwanaan karo ku saabsan.’
Sababta doodda loo qabanayaana waxa ay tahay in dhegaystayaasha labada qof ee
doodada isku dhegaysanayaa ay mid ku qancaan labadaa doodood tii macquulsan.
Qoraa Nancy, waxa ay ku doodaysaa in sababta loo barto dooddu ama loo doodaa ay
tahay in ay dadka dhisto oo ay
horumariso awooddii akhriseed, fekercarineed, qoraalleed ama hadal ee qofka ama
ardeyga.
Waxa
ay ku doodaysaa sababta ugu wayn ee buugeegan laga baran karaa inay tahay in
qofku barto sida loo akhriyo, indha’indheeyo, loo dhegaysto, loona qiimeeyo
dadka ka feker duwan ee doodda kale ama aragti kale qabo. Mar labaadka, in
qofku u fekero si carin ah oo uu qoro ama usoo jeediyo si wacan oo dadka
qancisa. Sidoo kale, qoraagu waxa ay qabtaa in qofku waxa uu ku doodayo ee uu
mahwiga la imanayo uu isku habaysto oo ugu yaraan wax dhiibsan oo dhisan oo la
fahmi karo uun la yimaaddo.
Intaa
ka gadaal Qoraayaddu waxa ay qaybinaysaa doodda ‘ Immisa ayaa loo qaybiyaa
doodda?’ Waxa ay u qaybisay laba qaybood; Mid Dhaqaneed, iyo mid ka dhaadhicin
ah. Ta hore ee dhaqanka, waxa ay ku doodaysaa inay tahay mid hore oo guun ah oo
ay isticmaali jireen dadkii qarniyadii hore. Waxaynna ku doodaysaa in Aristotle
uu bilaabay, sida uu ku caddeeyay buuggiisa ‘ On Rhetoric’ intii u dhexaysay
360 illaa 334 BC. Tusaalayaasha qeybtaa dhaqanka waxaa ka mid ah ‘Masraxyada
furan’ ee dadku wax ku kala faa’deystaan sida doodda loo qabto musharraxiinta
doorasho galaya IWM. Waxa kale oo ka mid ah ‘ Dood’dhiibashada qofeed’ ee qofku
intuu dad isku yeedho uu ka horhadlo iyaguna ay dhegaystaan, dabadeedna uu ku
qanciyo.
Qeybta
labaad ee doodda qoraayaddu waxa ay qabtaa inay tahay qaybtaa ‘ ka
dhaadhicinta’ oo waxa ay ku doodaysaa inay tahay mid aqoon mugdheer la
xidhiidha oo lagu keenay ama laga soo dhiraandhiriyay akhris, gorfeyn, qoraal,
fekrad abuur cusub, aqoon cusub, iyo aaminaado runa oo la xidhiidha arrimo
murugsan, misana cakiran. Sidoo kale, dhexdhexaadinta iyo waanwaantu inay
qaybtan soo gelayaan ayay ku doodaysaa.
Nancy,
waxa ay iswayddiinaysaa ‘ xaaladdee ayay Dooddu aad ugu wacantahay?’ Dabadeed
waxa ay qabtaa in marka dhawr qodob laga helo ay dooddu si wacan u socoto,
misana noqonayso mid la mahadiyo. Qodobbadaa waxaa ka mid ah:
1-
Inay jirto arrin laga doodayaa (Issue): Haddii ay jirto
xaalad cusub ama arrin cusub oo soo darriday ama jirtayba, se aan wax xala laga
gaadhin, waa in markaa xal laga gaadhaa. Waxa qasaba in xaluheliddaa arrintana
ay fekrado kalageddisani iman doonaan.
2-
Doode: Waxaa iyana lagama maarmaan ah inuu jiro
qof bilaabay doodda, ama curiyay oo dhaliyay asalkaba. Qofkaasi oo fekrad qaba,
dabadeed dadka kale uu wayddiiyo waxa ay ka qabaan.
3-
Dhegaystayaal/
Markhaatiyaal; waa inay jiraan dad goobjoog ahi, ha ahaadaan kuwo ku
raacsan ama ku diidan bee. Dadkaasina kaliya ma noqon karaan kuwa dhegaysta
uune waxa ay noqon karaan kuwo akhrista, daawada, eega. Sidoo kale, waa inay
fahmi karaan, fekeri karaan, su’aal wayddiin karaan, la faqi karaan, waxna uga
jawaabi karaan.
4-
Waa inayt jirto meel laga duulayaa; Waa inay dooddu
leedahay meel u dhex ah lana xidhiidha arrinta, oo labaduba ka duulaanayaan.
5-
Gole; dadku waxa ay u baahanyihiin fagaare ay
ku doodaan oo ay ku dareen hal’abuurkooga, laguna dhegaysto waxa ay ka
hadlayaan.
Intaa ka dib Nancy, waxa ay iswayddiinaysaa ‘
Goorma ama xaaladahee ayay dooddu dhicisoobaysaa ama guuldarraysanaysaa?’ waxa
ay ku doodaysaa marka dhawr qodob laga helo in dooddu fashilmayso. Qodobbadaa
waxaa ka mid ah:
1-
Ma jirto sabab loo doodo ama wax lagu
kaladuwantahayba ma jiro; Waxa aynnu hore usoo carrabaabnay in dadku doodayaan ama
doodduba imanayso marka uu jiro is afgaranwaa ama in wax si loo wada arki waayo
ee wax lagu kala duwanaado, ee labo qof iyo wax ka badan fekrad isku diidaan.
Markaa haddii aynna jirin kaladuwaansho doodi ma jirayso, hadday jirtana way
fashilmaysaa.
2-
Dhibaato/ khatar; haddii ay jirto
khatar ama dhibaato culus oo dadka qaar u diidan inay doodaan, sida qofka
diiddan inuu wax cusub barto ama isaga xagjirnimo badani hayso, markaa way
fashilmaysaa dooddii.
3-
Waxa adeg in la sameeyo meel laga duulo/
ma ba jirto meel laga duulo; sida aynnu hore u soo sheegnay dood aan lahayn
meel ay sal ku hayso ama meel laga duulo oo laga karaarqaataa way fashilmaysaa.
Nancy, waxa ay aad ugu nuuxnuuxsanaysaa in
qofku marka koowaad uu fahmo qofka uu la doodayo, iyo dadka dhegaysanayaba
haddii la ishorfadhiyo, iyo inuu si wacan u fiiriyo ilaaliyo qoraalka qofka
kale iyo erayada haddii arrintu qoraaltahay. Sidoo kale, in qofku aad u
taxliiliyo waxa loo sheegayo marka uu dhegaysto ka dib, iyo inuu isagu
fekerradiisa si wacan u dhiibto.
Qoraa Nancy, waxa ay in badan ku celcelinaysaa
in qofku aad u baadho, oo nuqullada, buugaagta, jaraa’iddada, wargeysyada, iyo
ilaha kale ee waxa laga baadhaba macmiil ka dhigto oo waqti badan saaxiib ka dhigto.
Sidoo kale, inuu qofku meelaha uu indha’indhayn ku sameeyo meelaha wax laga
urinayo kolba wixii xigtiisa xoojinaya ee kabaya aragtidiisa.
Waxa kale, oo ay Nancy meelo badan ku
hingaadinaysaa in qofku carinta fekereed barto oo si wanaagsan oo aqoonaysan u
fekero. Dabadeed, si gobonnimo iyo aqooni ka muuqato u cariyo dadka ka feker
duwan. Waxa se ka mamnuuc ah qof wax carinaya inuu shakhsiyadda qofeed wax ka
sheego in ka badan inta uu jabnaanta fekereed ee qofka wax ka sheegayo.
Mid kale, ayay aad ugu celcelinaysaa Nancy oo
qofka doodaha ah kula talinaysaa. Waxa weeyi inuu qofku wax qoro, waliba wax
qoro maahee wax hagaagsan oo hagarbax ah qoro, isaga oo qofku si aqoonaysan oo
ilbaxnimo wax ka muuqato wax u qoraya. Waliba waa inuu qofku raaco hannaanka
qoraalka. In qofku marka koowaad qoraalkii qoro, dabadeed indha’indheeyo,
haddana saxo, dabadeed tifaftiro oo saxo, markuu saxo wixii ka danbeeya ayuu
gudbin karaa. Waxa kale oo qoraayaddu ku doodaysaa in qofku qoraal sahamisan oo
saxartiran qoro.
Intaa ka dib Nancy, waxa ay soo guurinaysaa
dhawr qodob oo ay ka soo xiganayso Qoraa Stephen Toulmin, oo qoray buugga ‘
Uses of Argument.’ Qodobbadaa waxaa ka mid ah:
1-
Mucda Doodda; waata la
iswaydiinayo, Muxuu qoraagu doonayaa inuu caddeey? Maxaa u sal ah?
2-
Xogta uu ku hayo wuxuu ku doodayo/ ama
waxyaabaha uu ku taageerayo dooddiisa; waxa la wayddiinaya, xogta dheeraadka ah ee uu
u hayo waxa uu ku doodayo? Waxa uu dadka ku qancinayo? Inuu tusaalayaal
noolnool ka bixiyo fekraddiisa. Iyo sida uu u difaacayo.
Dhinaca caddeynta doodda, iyo waxa uu qofku ku
taageerayo ama uu ugu qanacsanyahay aragtida, waxa ay Nancy iyada oo Aristotle
ka soo xiganaysa sheegaysaa saddex qodob. Qodobbadaasi oo ay ku raacayso
iyaduna waxoogaanna ku sii kabayso. Saddexda qodob waa kuwan:
1-
Inuu dooduhu sababeeyo aragtidiisa; qofka doodayaa waa
inuu sababo macquul ah oo caqliga galaya, la fahmi karo, iyo dareenle la yimaaddo. Waxa uu ku doodayaa waa inuu
ahaado wax uu caddayn u hayo ama uu arkayba.
2-
Runnimada; Waa in dooduhu waxa
uu ku doodaya sida ay u idilyihiin ay yihiin wax dhaba, oo aan guud ahaan waxa
bini’aadanku islayaqaan uuna ka hor iman, gaar ahaanna waa inuuna dhaqanka
meesha uu joogo uuna jidhdiidin.
3-
Waa inay Caaddifad ka madhantahay; Qofka doodaha ahi
waa inayna wax caaddifad ahi ku jirin oo uuna cadaawad, murugo farxad iyo
waxkasta oo dareen la xidhiidhaa aynna riixayn.
Maadaama
qofku mawdduuc ama arrin ku doodayo, waa inuu xogbadan hayaa oo baadhaa.
Baadhiddaa iyo xogtaa uu soo xiganayo ee kuu doodayo haddii uu meelo ka soo
qaatay waa inuu xusaa, oo sheegaa, ee uuna qarin. Qoraa Nancy waxa ay
doodayaasha leedashay ‘ Iska ilaaliya xatooyada’ iyo inaad qarisaan meeshii aad
wax ka soo dheegateen ama xogtan aad ku doodaysaan aad ka keenteen. Waa muhiim
in qofku xatooyadu iska ilaaliyo oo meeshii uu wax ka keenay iyo ciddii lahayd
ba xuso.
Iyada
oo arrintaa xatooyada sii dabasocoto Nancy, waxa aad ugu dheeraanaysaa qaabka
loo qoro xigashada, iyo dheegashada xogta ama qoraallada aqooneed. Inta danbe
ee buugga arrintaa ayay xoogga ku
saaraysaa. Waxa ugu muhiimsan waa sidii loo qorayo xigashada. Haddan Nancy,
waxa ay qabtaa in loo qoro qaabkan ‘ La sheego meesha laga helay xogta, qofkii
qoray, xilligii la qoray, meesha uu ku qoray, iyo sifooyinkii uu qoraalkaasi
lahaa, haddii uu yahay maqaal, Joornaal, wargeys, Buug, Websayd ama meel kale
oo wax lagu qoraba.
W/Q:
Cabdirasaaq Sandheere.
May
31, 2019, ama 26 Rabadaan, 1440.
Comments
Post a Comment