Dadku Waa Noole Fekera. Balse…

 

Waa muhiim in aad fekertaa. Se waxaa ka sii muhiimsan in aad ogaato sida aad u fekrayso. Masaafada u dhexaysa fekerka caadiga ah, iyo barashada sida loo fekeraa way dheertahay. Qofkasta waxa uu leeyahay qaab ku habboon oo uu u fekero. Dadkuna waa noole jira oo fekera. Balse, dhibaatadu waxa ay ka joogtaa koruqaadidda mustawaha fekerka; iyo samaynta qorshe fekereed qaabaysan. Sidaa daraaddeed, ayay Reer Galbeedku u qorsheeyaan Manhaj tarbiyeed oo qofka u tababbaraya inuu fekero; oo qofka baraya sidii uu u baranlahaa sida loo fekero. Halka innagu ka Caalam Islaam ahaan, aynnu qofka ka dhigno mid u dabran waxa la isla garanayo, ama isagu uu yaqaan, ee aan la baran sidii uu uga shaqaysiin lahaa waxyaabahan ku hareeraysan agtiisa.

Waa muhiim in aynnu baranno sida loo fekero. Se waxaa ka sii muhiimsan in aan wanaajinno qaabka aynnu u fekeraynno, oo aynnu baranno fanka wax’akhriska, iyo fanniyada kale ee aqoonbaadhista. Bini’aadanku akhrisla’aan waa nasakhane laba jibbaaran. Haddii uu ka madhanyahay samaynta cilmibaadhis aqoonaysan wuxuu ku kaliyaysanayaa goob aamina oo ka maqan werwer. Werwerkuna waa ka beera ee sameeya caqli aqoonaysan, ee fekerkana wanaajiya. Dadka werwersani waa kuwa ay la warrantay Aayadda labaad ee Suuradda Qiyaama. Nafta canaanta badani waata qofka ku abuurta werwer, wax iswayddiin, baadhid, iyo gorfeyn.

Waa muhiim in fekerka la wanaajiyaa. Se waxa ka sii muhiimsan in aynnu baranno akhrisnaqdineedka. Akhrisnaqdineedku maaha ka keena diidid naqdin daraaddeed. Balse, qofka fekeraya ee wax naqdiyayaa wuxuu wax u naqdiyayaa si uu xaqiiqada u gaadho. In xaqiiqada la gaadhaana maaha wax fudud. Balse, waxa lagama maarmaan ah dadaal caqliyeed ballaadhan oo aan kala go’ lahayn; iyo wax akhrisyo xeeldheer. Iyo sidoo kale, in waaqica taagan si garasho iyo aqoonle loo akhriyo. Hore waxa uu Suqraad u yidhi: “ U raac daliilku meelkasta oo uu kugu hago, hadalku qiima malaha marka uu ka madhanyahay xujo iyo daliil.” Culimadeennu waxa ay sugeen qaacido dahab ah “ Haddii aad soo guurinaysid, waxa wanaagsan ku dadaal. Haddii aad yeedhe ‘ Muddacitahay’ daliil cusko.”

Waa muhiim in aad baratid fekernaqdineedka. Se waxaa ka muhiimsan in aad liqi kartid ama aqbali kartid fekerka kaa duwan, haba ka fogaado fekerradaada e. Qofku waxa wanaagsan dhinac buu ka arkaa, dhinac walba kama wada arko. Waxaanna suurtagala inuuna wixii SAXDA ahaa arkine uu qof kale arko. Sidaa daraaddeed, in la aqbalo fekerka kaa duwani waa lagama maarmaan. Ilbaxnimada Islaamku waxa ay sugtay Qaacidadan “ Aragtidaydu waa sax, se QALAD way noqon kartaa. Aragtida asaaggayna waa QALAD, se sax way noqon kartaa.” Waa aragtid ilbaxnimo ku dhisan. Balse, qaar ka mid ah dhallinyarada baraarugga ahi waxa laga yaabaa inay aaminaan in ururkoogu uu yahay, ururrada ka ugu kheyrka badan. Dadaalka ay Culimadoodu sameeyaan inuu metelo dhammaadkii sooyaalka, iyo in caqligii Islaamku culimadooda ka agdhawyahay. Ma akhriyin in qaar ka mid ah Culimada Fiqigu sheegeen in SAXDU badan karto, oo ay jirto MADARASAD loo yaqaan ‘ SAXNAAN’ oo ku agtaalla Madarasadda ‘ QALADKA’ oo ay ka dhoohanyihiin kuwa mooday in Mujtahid kastaa saxnaanta ku joogo. Sidoo kale, tani waa martabad sare oo sheegaysa bisayl fekereed iyo fahan ba.

Waa muhiim in aad aqbasho aragtida kaa duwan. Se waxaa ka sii muhiimsan barashada la noolaanshaha aragtiyaha iska soo hirjeeda, dugsiyada kala duwan, ururrada iskhilaafsan, iyo Xisbiyada kala duwan. Ma jirto cid Alle dhulka ku meteli kartaa, marka laga reebo Nebiyada. Nebinnimana Nebi Muxammed NNKH dabadii ma jirto. Ma jiro qof ku hadli kara magaca Samada. Dhammaan waalla dadaalayaa. Dhammaanteen dadka wanaag ayaynnu la jecelnahay. Dadkuna caqli bay leeyihiin. Maaha carruur u baahan dardaaran.

Waa muhiim in aynnu baranno in dadka si nabdoon loola noolaadaa. Se waxaa ka sii muhiimsan in aan kala saarno QOFKA iy ARAGTIDA. Waxa innagu waajib ah in aynnu la dhaqanno fekerrada uu qofku keenayo, innaga oo aan xukumin damiirkiisa, iyo anshaxiisa. Uma baahnin noloshiisa gaarka ah. balse, waxa aynnu eegaynnaa aragtidiisa, oo waynnu ka qaadanaynaa wixii wanaagsanaada ee qaadasho u qalma. Wixii kalana waynnu iskaga tagaynaa. Aragtida wanaagsan qof aan Muslin ahayn waynnu ka qaadan karnaa. Aragtida xun ee qof Muslin ah ka soo fushaynna waynu ka tagaynnaa. Waxaynnu aragnaa aragtiyo xun oo qof Muslin ah ka yimid sida kuwa baabbiiyay shucuub badan, ee bilaa tudhidda ah.

 

W/Q: Sh. Cabdiraxmaan Bashiir

W/T: Cabdirasaaq Sandheere

Oktoobar 16, 2019.